«Мы будзем прасіць абмеркаваць магчымасьць разьмяшчэньня ў Літве пэўных дадатковых — няхай нават экспэрымэнтальных — тэхналёгіяў і выпрабаваць іх у рэальных зьменлівых умовах», — заявіла міністар абароны Літвы Давіле Шакалене, паведаміла выданьне LRT.
Паводле інфармацыі МЗС Літвы, адпаведны ліст міністры накіравалі новаму генэральнаму сакратару NATO Марку Рутэ.
Міністар замежных справаў Літвы Кястуціс Будрыс у выніку папярэдняга расьсьледаваньня інцыдэнту з дронам паведаміў аб сытуацыі хаўрусьнікаў у NATO.
«Гэта пытаньне ня толькі бясьпекі Літвы, але і ўсёй паветранай прасторы NATO і Эўразьвязу», — адзначыў ён.
Кястуціс Будрыс падкрэсьліў, што Літва будзе супрацоўнічаць з хаўрусьнікамі як у распрацоўцы супольных тэхнічных рашэньняў, так і на дыпляматычным узроўні, каб узмацніць ціск на Расею — крыніцу падобных пагрозаў.
Што папярэднічала
- 28 ліпеня раніцай у Літву заляцеў неапазнаны дрон зь Беларусі. Яго заўважылі над Вільняй.
- Паліцыя разаслала жыхарам Вільні sms-папярэджаньні з парадай пры выяўленьні бесьпілётніка трымацца ад яго далей і паведаміць на нумар тэрміновых службаў 112.
- Дрон змаглі знайсьці толькі на пяты дзень пасьля інцыдэнту. Ён быў на вайсковым палігоне ў Гайжунах, Ёнаўскі раён.
- Праз інцыдэнт з дронам у Літве ўзмацнілі ахову неба. Таксама былі абвешчаныя пляны ўмацаваць мяжу і набыць новыя сродкі выяўленьня бесьпілётнікаў і барацьбы зь імі.
- Бюро крымінальнай паліцыі Літвы расьсьледуе інцыдэнт як ваеннае злачынства.
- 1 жніўня Міністэрства замежных справаў Літвы выклікала прадстаўніка амбасады Беларусі і ўручыла яму ноту, у якой выказала рашучы пратэст у сувязі з уварваньнем бесьпілётнага лётнага апарата зь Беларусі ў паветраную прастору Літвы.
- Першы інцыдэнт зь бесьпілётнікам быў 10 ліпеня. Расейскі дрон «Гербера», які імітуе «Шахед», упаў у Літве за кілямэтар ад беларускай мяжы. Выбухоўкі ў ім не было.
Форум