Як паведамілі выданьні The Washington Post і Middle East Eye з спасылкай на крыніцы ў амэрыканскай адміністрацыі, Трамп мае намер стаць пасярэднікам у дасягненьні мірнага пагадненьня паміж гэтымі краінамі.
Крыніцы Middle East Eye адзначаюць, што Аліеў і Пашыньян могуць падпісаць мэмарандум з абавязаньнем імкнуцца да мірнага дагавору.
Ва ўрадзе Армэніі пацьвердзілі, што Пашыньян у Вашынгтоне 7–8 жніўня возьме ўдзел у трохбаковай сустрэчы з Трампам і Аліевым «для спрыяньня міру, працьвітаньню і эканамічнай супрацы ў рэгіёне».
Сустрэча ў Вашынгтоне стане працягам перамоўнага працэсу, які доўжыцца ўжо некалькі гадоў. У сакавіку 2025 году Баку і Ерэван паведамілі, што ўзгаднілі праект мірнага дагавору з 17 артыкулаў, якія ўключаюць узаемнае прызнаньне тэрытарыяльнай цэласнасьці, дэлімітацыю і дэмаркацыю межаў, а таксама адмову ад разьмяшчэньня сілаў трэціх краін уздоўж мяжы і адкліканьне пазоваў зь міжнародных судоў.
У ліпені Аліеў і Пашыньян правялі чатырохгадзінныя перамовы ў Абу-Дабі — першы раўнд двухбаковага дыялёгу без пасярэднікаў. Тады бакі заявілі, што гэты фармат найбольш эфэктыўны для абмеркаваньня ўсіх пытаньняў нармалізацыі, але дамоўленасьцяў не дасягнулі.
Форум